梁東 leung_dont: HK Fucked up / 性誕快樂 (1/2)

在香港過聖誕 ﹐ 感覺越來越恐怖。

使出大將之風擺明車馬出招還有機會螳臂擋車 ﹐ 只可惜無論黑白兩道還是其他各路江湖人馬都選擇棄明投暗 ﹐ 陰 D 陰 D 塞比你嘆似乎更能正中要害。

我明 ﹐ 這裡是一樣米養百樣人的香港 ﹐ 心術不正的人一定大有人在。說穿了 ﹐ 聖誕節唔係去消費就係被消費 ﹐ 唱 K 去 Party 行商場睇戲同埋食所謂聖誕大餐﹐ 大節流流竟然同清明端午中秋等節日一模一樣 ﹐ 又將精神肉體金錢時間前仆後繼地投放 o係呢 o的地方上面 ﹐ 唔怪得大多數香港人都係一有多餘錢就身痕 ﹐ 以為有得買有得晒好鬼過癮 ﹐ 其實我們都只靠身外物充撐場面 ﹐ 心靈同戶口到頭來一樣空虛到爆。

你可以怪曾蔭權 ﹐ 你可以怪藤原浩 ﹐ 隨便你。不過當阿 SIR 上網 BID o野 MISS 今日 Ne-Net 聽日 MERCIBOUCOUP﹐ 你阿爸玩車你阿媽買 A.P.C. 比你過冬 o既時候 ﹐ 你會發現罪魁禍首其實一街都係﹐ 真正原因不外乎係上樑不正下樑歪。

再講 ﹐ 唔理邊條係上樑邊條係下樑 ﹐ 我地社會好似無乜邊條係棟樑。 360 重見天日 ﹐ 竟然唔係拜神切燒豬然後叫一眾傳媒入房聽專業工程師解拆善後調查工作 ﹐ 而係局長自己同埋一干擦鞋仔女懶型揮晒手搭纜車入大佛 ﹐ 仲要叫埋表弟曾志偉撐場唱好。照辦煮碗學娛樂圈人搞活動可能話都無 o甘易 ﹐ 弊就弊在昂平市集商戶真金白銀做生意 ﹐ 過了大半年烏蠅都拍唔到隻 o既歲月 ﹐ 局長一句同情說話都講唔出口 ﹐ 反而戴住頂毫無本地特色兼醜陋無比 o既 360 Cap 帽(旺角有 DUSTY 有 ONEWAY﹐ 李燦森有 SUBCREW﹐ BRIAN 有 8FIVE2﹐ 楊志超有 G.O.D.﹐ 馬時亨你如果真係唔知乜 o野叫美學 ﹐ 打 o黎蘋果副刊搵我 ﹐ 我地成班兄弟姐妹免費幫你搞又點話 ﹗ )﹐ 對住鏡頭大刺刺講 "愛上藍 ﹐ 戀上綠"﹐ 去到後來連個天都頂唔順那股氣焰 ﹐ 竟然大吉利是又再出現停駛事故 ﹐ 這 ﹐ 應該叫做現眼報。

環顧呢個世界其實邊有 o甘多騎呢怪 ﹐ 只是照辦煮碗唔經大腦的人太 OVER-POPULATED。老母打仔於是被仔告 ﹐ 有冤無路訴是以以暴易暴﹐ 事情兜兜轉轉因果循環﹐ 有乜 o野阿爺阿嬤就有乜 o野阿爸阿媽就有乜 o野阿仔阿女 ﹐ 於是乎乜 o野樂壇就養活乜 o野歌手同乜 o野電台。樂壇上有一個人叫林子萱﹐ 自稱去過澳洲讀心理學同亞洲研究﹐ 並在其個人網誌聲言極愛唱歌填詞同於舞台上表演﹐ 但係早前出席活動時 ﹐ 當被記者問到以往十分豐滿的上圍為何勁縮，林小姐有以下回應：

「我想轉形象，行淑女路線，而且近排瘦，所以上圍縮一個碼，胸圍都要買過晒，可能會令大家以為我拎走呢， 所以我預狂飲木瓜奶泵行佢，等暑假可以性感番少少。

什麼叫狂飲 ﹐ 什麼叫泵行佢﹐ 我們都樂意從科學角度聽修讀心理學和亞洲研究的林同學逐一分析。只是當一名歌手願意如此放下身段為第二天娛樂版其中一條小題而賤賣自己 ﹐ 我想講 ﹐ 林小姐 ﹐ 如果天有眼 ﹐ 如果個天仲有眼 o既話﹐ 就算你飲多幾多個貨櫃 o既木瓜奶 ﹐ 泵到自己勁過動漫 MAGGIE 都好 ﹐ 你是不會有運行的。